సుభాషితము
సీ. సగరు పురూరవు సత్యహరిశ్చంద్రు
నర్జును పురుకుత్సు నధిపునలుని
గయ భగీరథులను ఘనుడుసుహోత్రుని
భరత దిలీపులన్ పరశురాము
శ్రీరాము శశిబిందు శిబిని మరుత్తుని
రాజుయయాతిని రంతిదేవు
నంబరీషు పృథుని నధిపుమాంధాతను
వీడెనే కాలమ్ము వెంట గొనక
తే. కాన మృత్యువు కబళించు ఘనుల నైన,
తలచగా కాలమొక్కటే యిలను నున్న
మాన్యులకు మరి సకల సామాన్యులకును ,
కాలమును దాట జీవికి వీలు కాదు.
ఆ. మెఱుపుతీగ వంటి మేదినీసుఖముల
తగులు కొనియు నెపుడు తల్లడిలుచు,
నితర విధులు వీడి యింద్రియాలోలతన్
కాల మెపుడు నరుడు గడుప రాదు .
✍️గోపాలుని మధుసూదన రావు 🙏
కామెంట్‌లు లేవు:
కామెంట్‌ను పోస్ట్ చేయండి